Info
Joined: 27 Jan 2003 Posts: 2113 Location: Hong Kong
|
Posted: Mon Mar 06, 2017 10:05 pm Post subject: 22 Dec 2016 Tony attend <See U Tomorrow> HK Premiere |
|
|
學友教唱歌獲讚好聽 梁朝偉勁開心:將來合唱
相隔22年,梁朝偉同金城武合體演出王家衛擔任監製嘅電影《擺渡人》,電影今晚喺灣仔會展舉行慈善首映禮,全體主要演員都有出席,偉仔老婆劉嘉玲亦應邀做嘉賓上台一齊影相。另外,一向都話好鍾意偉仔嘅杜如風,都有把握機會同偉仔集郵。
講起同金城武合作,偉仔喺台上話:「同金城武合作咗好多部電影,大家都好有默契,今次係喜劇,但唔明白點解每一日金城武都要喊。」金城武就則指喺偉仔面前拍喊戲壓力好大,好彩現場播放音樂可以令佢投入角色。
之後偉仔單獨再受訪,對於佢唱嘅主題曲不俗,偉仔聞言開心謂:「真㗎?其實我都好大壓力,我話不如叫Eason唱,原來Eason本身喺電影已經有首歌,自己諗點樣會唱得好聽過Eason,但後來拍完套戲錄歌,感覺好唔一樣,錄嘅時候一幕幕畫面出現。」
唱得咁好會唔會開演唱會,偉仔就擰晒頭:「唔好喇掛,我咁懶,又唔會練歌。」佢又多謝張學友同Eason教佢唱歌,仲話希望將來同佢哋再合唱。講到大台喺深夜檔重播《新紥師兄2》,偉仔就話表示未有留意。
梁朝偉、金城武、陳奕迅、熊黛林同Angelababy等主演、王家衛擔任監製嘅電影《擺渡人》,今晚喺灣仔會展舉行慈善首映禮,除咗王家衛同一眾演員外,偉仔老婆劉嘉玲亦有撐場,仲上台做埋嘉賓。
王家衛喺台上被問到自94年《重慶森林》後,再次同梁朝偉、金城武合作,三劍合璧感覺如何時,佢話:「再拍套戲紀念澤東20周年,點解揀呢個日子上?因為仲有幾日就2017年,希望大家唔好將遺憾留喺2016,迎接2017。」今次宣傳一班演員齊晒腳,王家衛覺得好開心,更開心嘅係Angelababy大住個肚,同腹中BB一齊出席。
而有咗身孕8個月嘅Baby着住平底鞋,出入都有人扶住,佢冇透露開刀定順產,亦冇講會係B仔定B女,只係話會留港生B,老公黃曉明下個月就會返香港陪佢一齊生B。
《擺》片導演張嘉佳表示唔識講廣東話,多謝Eason教咗佢幾句,但就唔適合喺呢個場合講,但佢都有開估繼而笑謂:「Eason仆街啦。」令到全場發笑。而熊黛林就表示戲中同Baby鬥法,拍戲時飲超過100杯水,由於如厠頻密,幾乎同Baby包起咗個洗手間。 |
|